Ghalib ke Khatoot 
Ghalib ka Khat Mirza Allauddin Ahmad Khan ke naam

Ghalib ne apne khaton me bilkul saaf bol chaal ki zubaan likhi hai lekin ye haqeeqat mein itni saada nahi hai. Ye sach hai ki Ghalib ne purane zamane ka tareeqa badi had tak chhod diya aur apne khaton mein jo lambe lambe alqab aur laffazi se bhari huyi baten hoti thin unko bahot bahot kam ikhtiyaar kiya. Yahan ham aaapko Ghalib ke Khatoot Ghalib ka Khat Mirza Allauddin Ahmad Khan ke naam pesh kar rahe hain. 

Ghalib ke khaton ka asal kamal ye hai ki Ghalib ne Farsi aur Arabic ko apne khaton mein is tarah khapaya hai ki zubaan ki satah buland ho gayi hai fir bhi Ibaarat bojhal nahi ma'aloom hoti. Aisa ma'aloom hota hai ki koi bahot padha likha lekin hansmukh shakhs aap se be- takalluf baten kar rha hai. Hansi mazaaq ki baten bhi Ghalib ke khaton ka ahem Ansar hain lekin jis tarah wo hansi mazaq ki baten karne par qadir hain usi tarah ranj, ghussah, aur afsos ka izhaar karne par bhi qudrat rakhte hain. Unka kamal ye bhi hai ki kabhi-kabhi wo apne aap par hi hanste ya ghussah karte hain. Kabhi-kbhi doston se naraaz hote hain ya unko manaate hain. 

Ghalib ke khat padh kar aapko lagta hai ki aapne Ghalib ko dekh liya, ye khususiyat aur kisi ke khaton mein nahin milti. 

Ghalib ke Khatoot Ghalib ka Khat Mirza Allauddin Ahmad Khan ke naam

Ghalib ka Khat Mirza Allauddin Ahmad Khan ke naam

Jaan-e-Ghalib! 

                  Yaad aata hai ki tumhare Am-e-namudaar se suna tha ki Lughaat "dasateer" Ki firhang wahan hai. Agar hoti to kyun na bhej dete? Khair... 

           Ghalib ke KhatootAanchah maa darkaar daareem akasrat darkaar neest

Tum samr-e-nors ho us nihaal ke jis ne meri aankhon ke samne nasho-numaan paayi hai aur main hawa khwah wa saayah nasheen us nihaal ka raha hun. Kyun kar tum mujhko Azeez na hoge? Rahi deed wa deed, uski 2 suraten hain: Tum Delhi mein aao ya Lohar aao... Tum majboor, main ma'azoor. Khood kahta hun ki mera Uzr zinhaar mooa'a na ho, jab tak na samjh lo ki main kaun hun aur majra kya hai. 

You May Also Like

• Ghalib ka khat Meer Mehdi Majrooh ke naam

Suno, Aalam 2 hain: ek Aalam-e-arwaah aur ek Aalam-e-aab wa gil. Hakim in donon  Aalamon ka wo ek hai, jo khood farmata hai: "Limanilmulkulyaum? " Aur fir aap jawab deta hai: "LiLLahilwaHidulQahhar."  Har chand Qa'ada-Aam ye hai ki Aalam-e-aab wa ghull ke mujrim Aalam-e-arwaah mein saza pate hain, lekin yun bhi hua ki Aalam-e-arwaah ke gunahgaar ko duniya mein bhej kar saza dete hain. Chunanchah main 8win rajab 1212 hijri mein raubkari ke waste yahan bheja gaya. 13 baras Hawalaat mein raha. 7 Rajab 1225 hijri ko mere waste Hukm-e-dawaam Habs sadir hua. Ek bedi mere paanv me daal di aur Delhi shahar ko zindaan muqarrar kiya aur mujhe us zindaan mein daal diya. Fikr-e-nazm wa nasr ko mashaqqat thahraya. Barson ke baad main jail khane se bhaaga. 3 baras Blad-e-sharqiyah mein firta raha. Paayaankaar mujhe Kalkatta se pakad laye, fir usi mahbas mein bitha diya. Jab dekha ki ye qaidi gurez pa hai, 2 hathkadiyan aur badha di. Paanv bedi se fugaar haath hathkadiyon se zakhmdaar. Mashaqqat muqarrari aur mushkil ho gayi. Taqat yak qalam zail ho gayi. Be-Haya hun. Saal-e-guzishata bedi ko zaawiya zindaan mein chhod ma'a donon hathkadiyon ke bhaaga. Meerut, Muradabad hota hua Rampur pahuncha. Kuch din kam 2 mahine wahaan raha tha ki fir pakda aaya. Ab Ahed kiya ki aur na bhaagunga. Bhaagunga kya? Bhaagne ki taqat bhi to na rahi. Hukm-e-rihayi dekhiye kab sadir ho. Ek zaieef sa ehtmaal hai ki isi maah Zilhajjah 1277 hijri mein choot jaun. Bahr-e-taqdeer baad rihayi ke to aadmi siwaye apne ghar ke aur kahin nahin jata. Main bhi baad-e-nijat seedha Aalam-e-arwaah ko chala jaunga.

 

1(yakum) January 1860                                   Ghalib

Que:- Mirza Ghalib ka pura name kya hai? 

Ans:- Mirza Ghalib ka pura naam Mrza Asad-Ullah Khan Ghalib hai. 

Que:- Mirza Ghalib ka laqab kya hai? 

Ans:- Mirza Ghalib ka laqab "Ghalib" hai.