Jawab-e-Shikwa by Shayar Allama Iqbal

1913 me Jawab-e-Shikwa Allama Iqbal ne likha tha jo 1909 me Allama Iqbal ki likhi book Shikwa ka jawab hai. 'Shikwa' me jo sawaal Iqbal ne Allah se kiya tha 'Jawab-e-Shikwa' me un sawalon ke jawab dene ki koshish ki hai.

Jawab-e-Shikwa by Shayar Allama Iqbal

Dill se jo baat nikalti hai, asar rakhti hai

Par nahi, Taqat-e-Parwaz magar rakhti hai

Qudsi-ul-Asal hai Riffat pe nazar rakhti hai
Khaak se uthti hai gardon pe guzar rakhti hai

Ishq tha fitna gar-O-sarkash-O-chalak mera
Aasman cheer gaya naala-e-babak mera 

Peer-e-gardun ne kaha sunn ke, kahi hai koi
Bole sayyare, sar-e-Arsh-e-barin hai koi

Chaand kahta tha nahi Ahl-e-zameen hai koi
Kahkashan kahti thi poshida yahin hai koi

Kuch jo samjha mere shikwe ko to Rizwan samjha
Mujhko Jannat se nikala hua insaan samjha

Thi farishton ko bhi hairat ki ye aawaz hai kya
Arsh walon pe bhi khulta nahi ye raaz hai kya

Ta Sar-e-Arsh bhi insaan ki tagh-o-taaz hai kya
Aa gayi khaak ki chutki ko bhi parwaz hai kya

Ghafil aadab se sukkan-e-zameen kaise hain
Shokh-O-Gustakh ye pasti ke makin kaise hain

Is qadaer shokh ki Allah se bhi baraham hai
Tha jo masjood-e-malaik ye wahi  Aadam hai

Aalam-e-Kaif hai Daana-e-Ramooz-e-kam hai
Ha magar Ijz ke asrar se na-mahram hai

Naaz hai Taqat-e-guftar pe insanon ko
Baat karne ka saleeqa nahi nadanon ko

Aayi  aawaz  gam-angez hai afsana tera
Ashq-e-betab se labrez hai paimana tera

Aasman geer hua Naara-e-Mastana tera
Kis qadar shokh zubaan hai Dill-e-deewana tera

Shukr shikwe ko kiya husn-e-ada se tune 
Ham sukhan kar diya bandon ko Khuda se tune

Ham to maiel-ba-karam hai koi saiel hi nahin 
Raah dikhlayen kise rah-rav-e-manzil hi nahin

Tarbiyat aam to hai jauhar-e-qabil hi nahin
Jis se Ta'amer ho  Aadam ki ye wo gill hi nahin

Koi qabil ho to ham shaan-e-kayi dete hain
Dhoondhne walon ko duniya bhi nayi dete hain

Hath be-zor hain  Ilhaad se dill khoo-gar hain
Ummati baaies-e-ruswai-e-Paigambar (S.A.W.) hain

Butt shikan uth gaye baqi jo rahe butt-gar hain
Tha braheem pidar aur pisar aazar hain

Baada aasham naye bada  naya khum bhi naye
Haram-e-ka'aba  naya butt bhi naye tum bhi naye

Wo bhi din the ki yahi maya-e-ranayi tha
Nazish-e-mausam-e-gul lal-e-sahrayi tha

Jo Musalman tha Allah ka saudayi tha
Kabhi mahboob tumhara yahi harjayi tha

Kisi yakjaayi se ab Ahad-e-gulami kar lo
Millat-e-Ahmad(S.A.W)-e-mursil ko maqami kar lo

Kis qadar tum pe garan subh ki bedari hai
Hamse kab pyar hai haan neend tumhen pyari hai

Taba'a-e-Aazad pe qaid-e-Ramzan bhari hai
Tumhi kah do yahi aain-e-wafadari hai

Qaum mazhab se hai mazhab jo nahi tm bhi nahin
Jazba-e-baham jo nhi mahfil-e-Aanjum bhi nahi

Jinko aata nahi duniya me koii fun tum ho
Nahi jis qaum ko parwa-e-nasheman tum ho

Bijliyan jisme ho aasudah wo khirman tum ho
Bech khate hai jo aslaaf ke madfan tum ho

Ho niko naam jo qabron ki tijarat kar ke
Kya na bechoge jo mill jaye sanam pat-thar ke 

Safha-e-dahr se batil ko mitaya kisne 
Nau-e-insaan ko ghulaami se chhudaya kisne

Mere qaabe ko zabeenon se basaya kisne
Mere Quran ko seenon se lagaya kisne

The to aaba wo tumhare magar tum kya ho
Hath par hath dhare muntazir-e-farda ho

Kya kaha? Bahr-e-Musalmaan hai faqat waada-e-hoor
Shikwa beja bhi kare koii to lazim hai shaoor

Adal hai fatir-e-hasti ka Azal se dastoor
Muslim aayin hua kafir to mile hoor-o-Qasoor

Tum me huron ka koii chahne wala hi nahi
Jalwa-e-toor to maujood hai Moosa hi nahi

Manfa'at ek hai is Qaum ka, nuksan bhi ek
Ek hi sab ka Nabi(S.A.W), deen bhi,Imaan bhi ek

Haram-e-Paak bhi, Quran bhi, Allah bhi ek
Kuch badi baat thi hote jo Musalmaan bhi ek

Firqa bandi hai kahin, Aur kahi Zaten hain
Kya zamane me panapne ki yahi baten hain

Kaun hai tarik-e-aaina-e-rasool-e-Mukhtar
Maslehat waqt ki hoti hai kiske Amal ka ma'ayaar

Kiski aankhon me samaya hai sha'ar-e-aghyar
Ho gayi kiski nigah tarz-e-salaf se be-zar

Qalb me soz nahn,i rooh me ehsas nahin
Kuch bhi paigaam-e-Muhammad(S.A.W) ka tumhe pass nahin

Ja k hote hai masjid me saf-aara to ghareeb
Zahmat-roza jo karte hai gawara to ghareeb

Naam leta hai agar koi hamara to ghareeb
Parda rakhta hai agar koii tumhara to ghareeb

Umra nashsha-e-daulat me hain ghafil hamse
Zinda hai millat-e-Baiza ghurba ke  dam se

Waiz-e-Qaum ki wo pukhta-khayali na rahi

Barq-e-taba'ee na rahi, Shoa'ala maqali na rahi

Rah gayi rasm -e-Azan rooh-e-Bilali na rahi
Falsafa rah gaya talkeen-e-ghazali na rahi

Masjiden marsiya-khwan hain ki Namazi na rahe
Yaani wo shahib-e-ausaf-e-hijazi na rahe

Shor hai ho gaya duniya se musalmaan nabood
Ha ye kahte hai ki the bhi kahin Muslim maujood

Waza'a me tum ho nasara to tamaddun me hunood
Ye musalmaan hai jinhe dekh kar sharmaye yahood

Yun to Sayyed bhi ho, Mirza bhi ho, Afghan bhi ho
Tum sabhi kuch ho batao to Musalmaan bhi ho

Dam-e-taqreer thi muslim ki sadaqat bebak
Adal uska tha qawi laus-e-mara'at se paak 

Shajar-e-fitrat-e-Muslim tha Haya se namnaak
Tha Shuja-at me wo ek hasti-e-fokul-idraak

Khud-gudaazi nam-e-kaifiyat-e-sahba-yash bood 
khali-az-khwesh shudan Surat-e-meena yash bood 

Har musalmaan rag-e-batil ke liye nashtar tha
Uske aaina-e-hasti me amal jauhar tha

Jo bharosa tha use quwwat-e-baazu par tha
Hai tumhen maut ka darr usko khuda ka darr tha

Baap ka ilm na bete ko agar azbar ho
Fir pisar qabil-e-miras-e-pidar qkar ho

Har koii mast-e-maye e zauq-e tan-aasani hai
Tum Musalmaan ho ye andaze Musalmaani hai

Haidri Faqr hai ne daulat-e-Usmani hai
Tumko aslaaf se kya nisbat-e-ruhaani hai

Wo zamane me mua'azziz the musalmaan ho kar
Aur tum khwar huye tarik-e-Quraan ho kar

Tum ho aapas me gazabnaak, wo aapas me Raheem
Tum khatakaar-O-khatabeen ,wo khataen posh-O-Kareem

Chahte sab hai ki hon Auj-e-surayyya pe muqeem
Pahle koii waisa paida to kar Qalb-e-saleem

Takht-e-fagfur bhi unka tha sarrer-e-ke bhi
Yunhi baaten hai ki tum me wo hamiyyat hai bhi

Khudkushi shewa tumhara, wo ghyoor-o-khuddar
Tum ukhuwwat se gurezan wo ukhuwwat pe nisar

Tum ho guftar sarapa wo sarapa kirdar
Tum taraste ho kali ko wo gulista bah kinaar

Ab talak yaad hai qaumon ko Hiqayat unki
Nakhsh hai safha-e-Hasti pe sadaqat unki

Misl-e-Anjum Ufaq-e-Qaum pe raushan bhi huye
But-e-Hindi ki muhabbat me barhman bhi huye

Shauq-e-parwaz me mahjoor-e-nasheeman bhi huye
Be Amal the hi jawan deen se badzan bhi huye

Inko tahzeeb ne har band se aazad kiya
La k ka'abe se sanam khane me aabad kiya

Qais zahmat kash-e-tanhai e sahra na rahe
Shahar ki khaye hawa bad ye paiman na rahe

Wo to deewana hai basti me rahe ya na rahe
Ye zaroori hai hijab-e-Rukh-e-Laila na rahe

Gila-e-jor na ho shikwa-e-bebad na ho
Ishq Aazad hai q husn bhi aazad na ho

Ahad-e-Nau Barq hai, Aatish zan-e-khirman hai
Aiman is se na koi sahra na gulshan hai

Is nayi aag ka aqwam-e-kuhan idhan hai
Millat-e-khatm-e-Rasool(S.A.W) shola ba pairhan hai

Aaj bhi jo ho braheem(A.S.)  ka imaan paida
Aag kar sakti hai andaz-e-gulistaan paida

Dekh kar rang-e-chaman na pareshan ho maali
Kaukab-e-guncha se shakhen hai chamakne wali

Khash-o-khaashaaq se hota hai gulistan khali 
Gulbar andaaz hai khoon-e-shuhada ki laali

Rang gardon ka zara dekh to Unnabi hai
Ye nikalte huye suraj ki ufaq tabi hai

Ummat-e-gulshan-e-hasti me samar cheeda bhi hain
Aur mahroom-e-samar bhi hain, khizaan deeda bhi hai

Saikdon nakhl hai, kaheeda bhi, baleeda bhi hai
Saikdon watn-e-chaman me abhi poshida bhi hai

Nakhl--e-Islaam namoona hai bru-mandi ka
Phal hai ye saikdon saalon ki chaman bandi ka

Paak hai gard-e-watan se Sar-e-daman tera
Tu wo Yusuf hai ki har Misr hai kanaan tera

Qafila ho na sakega kabhi weeran tera
Ghair yak Bang-e-Dra kuch nahi samaan tera

Nakhl-e-shama asti-o-dar shola dawad resha-e-tu
Aaqbat soz bawad saya-e-andesha-e-tu

Tu na mitt jayega Iran ke mitt jane se
Nasha-e-mai ko ta'alluq nahi paimane se

Hai Ayan yurish-e-tataar ke afsane se
Pasba mil gaye ka'abe  ko saman khane se

Kashti-e-Haq ka zamane me sahara tu hai
Asr-e-nau raat hai, Dhundla sa sitara tu hai

Hai jo hangama bapa Yorish-e-Balghari ka
Ghafilon ke liye paigham hai bedari ka

Tu samajhta hai ye saamaan hai dill aazari ka
Imtehaan hai ye tere isar ka khuddari ka

Q hirasa hai sahil-e-faras-e-aada se
Noor-e-Haq bujh na sakega nafs-e-aada se

Chashm-e-aqwaam se makhfi hai  haqiqat teri
Hai abhi mahfil-e-hasti ko zaroorat teri 

Zinda rakhti hai zamane ko hararat teri 
Kaukab-e-qismat-e-imkaan hai khilafat teri

Waqt-e-fursat hai kaha kaam abhi baaqi hai
Noor-e-Tauheed ka itmaam abhi baqi hai

Misl-e-bu qaid hai gunche me pareshaan ho ja
Rakht-bar-dosh hawa-e-chamnistan ho ja

Hai tunk-maya tu zarre se bayabaan ho ja
Nagma-e-mauj hai hangama-e-tufaan ho ja

Quwwat-e-ishq se har past ko bala kr de
Dahr me ism-e-Muhammad(S.A.W) se ujala kr de

Ho na ye phool to bulbul ka tarannum bhi na ho
Chaman-e-dahr me kaliyon ka tabassum bhi na ho

Ye na saaqi ho to fir maye bhi na ho khum bhi na ho
Bazm-e-Tauheed bhi duniya me na ho tum bhi na ho

Khema-e Aflaq ka istada isi naam se hai
Nabz-e-hasti tapish-aamada isi naam se hai

Dasht me daaman-e-kuhsaar me maidan me hai
Bahr me mauj ki aaghosh me tufaan me hai

Cheen ke shahar maraqash ke bayabaan me hai
Aur poshida Musalmaan ke imaan me hai

Chashm-e-aqwaam ye nazara abad tak dekhe
Rifa'at-e-shaan-e-raffana laka zikr dekhe

Mardum-e-chashm-e-zamee yaani wo kaali duniya
Wo tumhare shohda palne wali duniya

Garmi-e-mahr ki parwarda Hilali duniya
Ishq wale jise kahte hai Bilali duniya

Tapish andoz hai is naam se pare ki tarah
Ghota-zan noor me hai aankh ke tare ki tarah

Aqal hai teri siper ishq hai shamsheer teri
Mere darwesh khilafat hai Jahangir teri

Ma-siwa-Allah ke liye aag hai Takbeer teri
Tu Musalmaan ho to taqdeer hai tadbeer teri

Ki Muhammad(S.A.W) se wafa tune to ham tere hai
Ye jahan cheez hai kya ye Lauh-o-Qalam tere hai