Ghalib ka khat Meer Mehdi Majrooh ke naam

Ghalib ne apne khatoot mein bahot hi khoobsurti se lafzon ko utara hai, aisa lagta hai jaise samne baithe shakhs se batein ho rahi hon, ya yun kah lijiye khat mein likhi huyi baten hamare nazron ke samne ka manzar hon.Yahan Ghalib ka khat Meer Mehdi Majrooh ke naam padh kar aapko unke khatoot nigari ka andaza ho jayega.

Ghalib ka khat Meer Mehdi Majrooh ke naam

Ghalib ka khat Meer Mehdi Majrooh ke naam:-

Aha ha ha! Mera pyara Mehdi aaya. Aao bhai mizaaj to achcha hai? Baitho, ye Rampur hai, Darussaroor hai. Jo lutf yahan hai, wo aur kahan hai? Paani, SubHaanAllah! Shaher se 300 qadam par ek dariya hai aur Kosi uska naam hai, Be shubha Chashma-e-Aab-e-hayaat ki koi soot is mein mili hai. Khair, agar yun bhi hai to bhai, Aab-e-Hayaat umr badhata hai, lekin itna sheereen kahan hoga? 

Tumhara khat pahuncha, taraddud Abs. Mera makaan daak ghar ke qareeb aur daak munshi mera dost. Na urf likhne ki haajat, na mohalle ki haajat. Be wiswaas Khat bhej diya kijiye. Yahaan ka haal sab tarah khoob hai aur sohbat marghoob hai. Us waqt tak mehmaan hun. Dekhun, kya hota hai. Ta'azeem wa tauqeer mein koi daqeeqah farogazaash nahin hai. Ladke donon mere saath aaye hain. Is waqt isse zyada nahin likh sakta. 

February 1860                                                  Ghalib

You May Also Like

• Ghalib ke Khatoot Ghalib ka Khat Mirza Allauddin Ahmad Khan ke naam

Ghalib ka khat Munshi Har Gopal Taftah ke naam

Kyun Mirza Taftah, tum be-wafa ya main gunahgaar? Ye bhi to mujhko maloom nahin ki tum kahan ho? Abhi ek Sahab meri mulaqat ko aaye the. Taqreeban tumhara zikr darmiyaan aaya. Wo kahne lage ki wo Kol........ mein hain. Ab main Hairaan hun ki khat Kol.... bhejun ya Sikandrabad! Agar Kol..... Bhejun to maskan ka pata kya likhun? Baberhaal Sikandrabad bhejta hun. Khuda kare pahunch jaye. Tumhaara deewan batareeq parcel mere paas aaya. Main ne harkare ko Raja Ummed Singh Bahadur ke ghar ka pata bata kar wahaan bhijwa diya. Yaqeen hai ki pahunch gaya hoga. 5-4 din se sunta hun ki wo Mathura aur Akbarabaad ki taraf gaye hain. Mujh se mil kar nahi gaye hain. Baberhaal is khat ka jawab jald likho aur zaroor likho. 

Bhai tum sayyah aadmi ho. Jahan jaya karo, mujhko likh bheja karo ko main wahaan jata hun ya jahan jaun wahaan se khat likho. Tumhare khat ke na aane se mujhe tashweesh rahti hai. Meri tashweesh tumko kyun pasand hai? 

Muharrarah tak shumbah                             Ghalib

27 March 1859   

Mirza Ghalib ka khat Qurban Ali Beg 'Salik' ke naam

Meri jaan kon auhaam mein giraftaar hai? Jahan baap ko peet chuka, ab chacha ko bhi ro. Khuda tujhko jeeta rakhe aur tere khayalaat aur ehtmalaat ko surat waqooyii de. Yahan Khuda se bhi tawaqqoa'a baqai nahi, makhlooq ka kya zikr? Kuch ban nahi aati. Apna aap tamashaayi ban gya hun. Ranj wa zillat se khush hota hun. Yaani maine apne ko apna gair tasawwur kiya hai jo dukh mujhe pahunchta hai, kahta hu: Lo Ghalib ke ek aur jooti lagi. Bahot itrata tha ki main bada shayar aur farsi da hun. Aaj door - door tak mera jawab nahi. Le ab qarzdar ko jawaab de. Sach to yun hai, Ghalib kya mara, bada mulhad mara, bada kafir mara. Ham ne azrah-e-taazeem, jaisa badshahon ko unke "Jannat aaram gaah" wa "Arsh-e-nasheeman" Khitab dete hai, choonki ye apne ko Shaah-e-qalamar wisakhn janta tha, "Saqar maqar" Aur "hawiya zawiya" Khitab takweez kar rakha hai. "Aaiye Najmuddaula Bahadur" Ek qarzdaar ka girebaan mein hath ek qarzdaar bhog suna raha hai. Mai in se puch raha hu : "Aji Hazrat Nawab sahab! Nawab sahab kaise, Oghlan sahab! Aap saljooqi aur afra sayabi hain. Ye kya be hurmati ho rahi hai? Kuch to ik so, kuch to bolo." Bole kya be-haya, be-gairat, kothi se sharab, ghandhi se gulaab, bazaar se kapda, mewa farosh se aam, sarrafvse daam qarz liye jata tha. Yr bhi socha hota, kahan se dunga.